Energi og miljø seglar ikkje under «falsk flagg»

Studieprogrammet Energi og miljø vart oppretta av faggrupper som i dag er Institutt for elektrisk energi (IE-fak.) og Institutt for energi og prosessteknikk (IV-fak.). Det var altså eit samarbeid mellom elkraft og varme- og strøymingsteknikk. Programmet og namnet vart vedteke av NTNU-styret («Kollegiet) i 1997, med første studentopptak i 1998.

Ytring

Miljøproblemer ved NTNU

Sigurd Skogestad (UA 26.3.) har funne ein definisjon på «miljøteknikk». Denne set han opp som den absolutte og einaste rette. At «miljø» og «miljøteknikk» ikkje er heilt det same, kan vi late ligge. Viktigare er det at «miljø» er eit mangfaldig omgrep. I eit sideblikk kan vi til dømes sjå at Klima og miljø-departementet held seg med ansvarsområde som følgjer andre avgrensingar. I motsetnad til Skogestad vil Energi og miljø-programmet ikkje hevde monopol på definisjonen av «miljø». «Bygg og miljø» var heilt uproblematisk for oss. For vår del kan Skogestad sitt institutt gjerne ha eit studieprogram «Kjemiteknikk og miljø». Det er meir enn nok miljøutfordringar å ta av, og ingen greier å femne om alt.

I universitetsdirektøren si innstilling til Kollegiet i 1997 heiter det at «Navnet ‘Energi og miljø’ er valgt for å understreke nær sammenheng mellom all bruk av energi og miljøpåvirkninger.» Denne samanhengen står ved lag; nokre døme kan nemnast:

Ein stor del av energien (om lag 90 %) brukt i verda vert omforma gjennom forbrenning. Mange miljøproblem kjem av dette, og betre forbrenning gjev mindre problem. Dette vert undervist som del av dei aktuelle faga i programmet.

All energibruk har miljøverknader. Brukar du meir, kostar det meir – også i miljøet. Meir effektiv energibruk er eit verksamt miljøtiltak, og det er sentralt i programmet.

Energisystem kan byggast og driftast på ein meir miljøvenleg måte, og slik at ein legg til rette for elektrifisering når det er tenleg.

Ein profil i studieprogrammet heiter Energi- og miljø-analyse og er ei spesialisering i industriell økologi. Dette er ei faggruppe med høg status nasjonalt og internasjonalt.

CO2-fangst og -lagring vil vere eit viktig tiltak for å bremse klimaendringane. Som Skogestad vel veit, er dette eit område han deler med forskarar og studentar frå vårt program.

Energi og miljø seglar ikkje under «falsk flagg». Vi er usikre på kva Skogestad eigentleg vil fram til – om det er noko. Miljø er så mangt, og det eine kan utfylle det andre. Vi diskuterer gjerne arbeidsdeling og utvikling av problemstillingane. Som sagt er det meir enn nok å ta av.