Nybygget opna til fest og jubel

Det runde, raude bygget vi kjenner som Samfundet, vart bygd i 1929. Då var det kring 400 studentar på NTNU, no er talet nærare 40 000. 

Nybygget er eit påbygg på baksida av det gamle bygget, med nye scenar, barar og arbeidslokale. Den historiske opninga vart heidra med seremoni, snorklipping og fest 10. august.

Leiar for Studentersamfundet, Rami Chumber, opna seremonien.

- Nybygget er eit prosjekt som samlar mange generasjonar av medlemmer på Samfundet, sa Chumber.

Nybygget har røter som strekkjer seg langt tilbake. Allereie i 1963 vart det lagt fram forslag i Storsalen om utviding av Samfundet ved utbygging på fengselstomta.

Samdundets fyste kvinnelege leiar, Siri Nansen, som får ein bar i nybygget oppkalla etter seg, vart møtt med stor jubel i Storsalen under seremonien. 

Ei rørt Siri Jemtland tok til talarstolen og fortalde om si tid på samfundet. 

- Då eg vart immatrikulert, vart det sagt at halvparten av undervisninga skulle føregå på botnen av bakken, sa ho i talen.

Statsråd for forsking og høgare utdanning, Oddmund Hoel, kom med ei helsing frå KD og regjeringa i si tale under seremonien. I talen kunne han også fortelle om sine fyste møter med studentersamfundet, når han sjølv var vidaregåande elev. 

– Studieprogresjon er viktig, men alle som bruker litt ekstra lang tid på å fullføre studia på grunn av arbeid ved Studentersamfundet er unnskyldt, sa statsråden, som har hatt studieprogresjon som eit av sine gjennomgåande mål for høgare utdanning. 

Sp-politikaren trakk også fram Samfundets rolle som ein viktig debattarena.

Monica Rolfsen, leiar for Samfundets finansstyre, hadde med seg ei lang takkeliste under seremonien. Finansieringa av nybygget har vore eit spleiselag mellom NTNU, Sit, Trondheim kommune, Trøndelag fylkeskommune, Reitan, og Kunnskapsdepartementet.

Jakob Selfors har vanka på Samfundet i fleire år. Han har gleda seg veldig til å få sjå nybygget frå innsida for fyste gong. 

- Eg gleder meg til å kunne gå meg vill i labyrinten Samfundet igjen, som då eg fyst kom til huset, sa Selfors.

Selfors er leiar av Velferdstinget, som blant anna har som oppgåve å bestemme kva semesteravgifta studentane betalar inn går til. Selfors fortel at pengar frå potten har vore del av nybyggfinansieringa. I år går 4 millionar kroner frå semesteravgifta til nybygg.

- Eg håpar alle som har betalt semesteravgift ved NTNU dei siste åra veit at dei faktisk har vore med å finansiere nybygget, som no kan samle enda fleire studentar, sa han.

Festen fortsetter inn i immatrikuleringa der dei nye studentane skal bli kjent med både det nye og gamle bygget. Stadig er det fleire uferdige lokaler som skal opne utover hausten.