- Det er kjekt å sjå at vi treffer når vi prøver noko nytt

- Me har klart å fylle alle bachelorstudia, og sjukepleiarstudiet som hadde ledige plassar er no også fylt opp. Så eg er veldig nøgd, seier viserektor ved NTNU i Ålesund, Anne-Lise Sagen Major.

1372 tilbod om studieplass i Ålesund er sendt ut.

Ålesund er kjend for sine maritime studium. Desse har også i år lange ventelister og høge poenggrenser for opptak. Innan nautikk, shipping management og ingeniør i fornybar energi låg krava på over 50 poeng.

- Alle desse tre programma utdannar kandidatar som næringslivet har stort behov for framover, og vi befester vår posisjon innan maritim utdanning, seier Sagen Major.

Medisinstudiet i Ålesund har ei av dei høgaste poenggrensene på NTNU. Studiet har eit delt løp, med dei to første åra i Trondheim og dei siste fire i Ålesund. 

- Vi gleder oss også ekstra til å ta imot det første kullet som søkte medisin i Ålesund då opptaket starta for to år sidan, seier Sagen Major.

Nye masterprogram treff godt

- Vi har i år to nye masterprogram, og begge har mange søkjarar. Det er kjekt å sjå at vi treffer når vi prøver noko nytt, seier Sagen Major.

Ei av dei nye masterprogramma, Management of Innovation and Sustainable Business Development, har treffe veldig godt internasjonalt. 18 tilbod om studieplass er sendt ut, som er eit høgt tal for eit internasjonalt masterprogram.

- Som i resten av landet er det nedgang i søkjarar frå utanfor EU/EØS, men vi har klart å treffe EU/EØS-søkjarane i den nye masteren. Vi kan ikkje vite heilt sikkert kva tala blir før studiestart, seier Sagen Major.

Nytt medisinstudium i Gjøvik går over all forventing

Den andre nye masteren er mekatronikk og automatisering, som er eit samarbeid mellom to institutt. Masteren kombinerer mekanikk, elektronikk og programmering.

- Vi har fylt alle studieplassane på denne nye masteren og har fleire på venteliste. Det er spesielt kjekt å sjå at vi får til samarbeid på tvers av institutta.

Eit anna masterprogram som har vore svært attraktivt, er helsesjukepleiar-masteren, som har 240 på venteliste.

Vil tenkje lenger enn opptakstiltak for å få god kjønnsbalanse

- Det er på våre ingeniørstudium som det er på dei fleste andre; jenteandelen er for låg. Og på sjukepleiar har vi for få gutar, seier Sagen Major.

Fleire av teknologiinstitutta i Ålesund har samarbeid med næringslivet om prosjekt for å skape større interesse for ingeniørutdanninga blant jenter frå ung alder, samt for å skape gode vilkår for kvinner i arbeidslivet.

- Vi har to bachelorar med kjønnspoeng i år, men vi ønskjer å jobbe meir langsiktig med kjønnsfordelinga. Men kjønnspoeng eller kvoter er ikkje nok. Ein må skape endring mykje tidlegare, og samarbeide med heile verdikjeda for kunnskap frå barnetrinnet til VGS, seier Sagen Major.

Tidligere bokser motiverte studenter til å bli sykepleiere

For å rekruttere fleire gutar til sjukepleiarutdanninga har NTNU Ålesund satsa på fellesskap mellom gutar, gjennom Ole-prosjektet. Ole-prosjektet gir mannlege sjukepleiarstudentar eit sosialt og fagleg nettverk, som skal gi støtte gjennom studietida.

60 nye studentar byrja allereie i sommarferien

Utover samordna opptak har NTNU Ålesund eit opptak av ingeniørstudentar med yrkesfagleg bakgrunn. Det er 67 prosent av ungdomsskuleelevar i Møre og Romsdal som vel yrkesfagutdanning. Sagen Major meiner det er viktig at mange vel å ta vidareutdanning for å dekkje regionale behov.

- I Møre og Romsdal har vi mykje industri, og dei med fagbrev som så tar y-vegen og blir ingeniørar, er veldig ettertrakta i næringslivet, seier Sagen Major.

Y-vegen gir moglegheit for å gå rett frå fagbrev til ingeniørutdanning. Dei som treng å ta kvalifiserande realfagsemne, får moglegheit til å ta dette over sommaren. Dette kallast TRES-vegen, det tredje semesteret. Det er omkring 60 studentar som er på Ålesund campus no for å førebu seg på å bli ingeniørstudentar til hausten.

- Eg vil spesielt trekkje fram linjeforeningane ved desse ingeniørstudia som tek dei nye studentane godt imot no i sommar. Fleire frivillige vel å bruke ferietida på å skape sosiale arrangement, for å med ein gong skape fellesskap og inkludering. Det er veldig kjekt å sjå, seier Sagen Major.