Derfor bør masseoppseiingar ved ILU bekymre alle tilsette ved NTNU

NTNU er no i gang med dei første masseoppseiingane i organisasjonenens historie. I første omgang vil NTNU seie opp 15 personar ved institutt for lærerutdanning.

Det kan vere at du synest det er riktig og vel fortent at ILU eller andre institutt må rydde opp i sitt eige økonomiske uføre. Eg kan ha forståing for dette synet.

Melder om 15 oppsigelser ved ILU

Likevel bør alle tilsette ved NTNU vere svært bekymra for korleis NTNU ser ut til å ville gjennomføre denne prosessen. Dette kan skape presedens for korleis slike prosessar vil foregå i framtida, og snart kan dette gjelde deg. Det kan også skade NTNUs omdømme. 

Nedbemanning utan drøfting på nivå 1

Dersom nedbemanninga får føregå slik NTNU har lagt opp til her betyr det at organisasjonen samla sett kan ha god økonomi, men likevel kan sparke folk på enkelte institutt eller fagseksjonar med grunngiving i raske og skiftande politiske og samfunnsmessige endringar. Ved SU er fire fagseksjonar ved Institutt for lærarutdanning utpeikt til å ta heile nedbemanninga. Ved min seksjon skal tre personar miste jobben. Nedbemanninga er altså snevra inn til fire små utvalskretsar, mens utgangspunktet i arbeidsmiljølova er at det er heile NTNU som er kretsen.

Ifølgje arbeidsmiljølova skal arbeidgivar så tidleg som mogleg innleie drøftingar med tillitsvalte med sikte på å komme fram til ei avtale for å unngå masseoppseiingar eller for å redusere talet på oppsagte. Desse drøftingane må føregå på nivå 1 i organisasjonen fordi det er rektor som er ansvarleg for økonomien og det er her det er økonomisk handlerom til å finne alternativ. Nedbemanninga ved ILU har ikkje vore drøfta på nivå 1. I følgje signala vi i naturfagseksjonen fekk i møtet om overtalligheit onsdag 25.9 har NTNU heller ikkje til hensikt å gjere det.

I staden ser det ut til at SU-fakultetet forskotterer nedbemanningsprosessen.

Tillitsvalte er ikkje informert

I eit haste-innkalla medlemsmøte med berørte fagseksjoner i regi av Forskerforbundet og Utdanningsforbundet fredag 27.9 kom det fram at tillitsvalte verken på nivå 1 eller 2 hadde vore med på drøfte prinsipp for nedbemanninga, eller var blitt informert på førehand om at fire fagseksjonar var valt ut til å ta heile nedbemanninga.

Det at fagforeiningane ikkje er informert, bidreg til å auke usikkerheit og stress for oss som er tilsette ved dei fire utpeikte fagseksjonane. Vi sit no med svært mange spørsmål som fagforeiningane ikkje kan svare på. Vi har blant anna blitt informert om at det skal gjennomførast kartleggingssamtalar i nær framtid, og vi er svært uroa for korleis utveljinga av overtalige skal føregå. Som tidlegare tillitsvalt med erfaring frå nedbemanning i NRK veit eg at fagforeiningar speler ei svært viktig rolle i å støtte og hjelpe tilsette i ein slik situasjon.

Fare for NTNUs omdømme

NTNU har eit godt omdømme. Men eit omdømme er lett å bryte ned. NTNU har alt å vinne på å oppføre seg som ein ansvarleg arbeidsgivar og forankre omstillings- og nedbemanningsprosessar i organisasjonen. Det kan berre skje gjennom reelle drøftingar og å finne fram til løysingar i samarbeid med arbeidstakarforeiningar. Dersom NTNU hoppar bukk over dette risikerer universitetet å bidra til mindre tillit hos eigne tilsette og i befolkninga for øvrig. Ikkje minst risikerer NTNU negativ omtale dersom det blir rettssaker mot tidlegare tilsette som meiner seg urettmessig eller usakleg oppsagt.

NTNU burde ha økonomisk handlerom til å finne alternativ til å sparke folk. Det er svært dårlig ressursbruk å gå til oppseiing av svært kompetente personar vi har investert så mykje i. Det er også stor risiko for at masseoppseiingar vil gjere at NTNU framstår som ein mindre seriøs og attraktiv arbeidsgivar i internasjonale forskarmiljø.

Dette bør også bekymre NTNUs styre. Vi bør forvente at handteringa av organisasjonens aller første masseoppseiingar er øvst på agendaen i neste styremøte i oktober.

gjesteskribenten

Styringssvikt i høyere utdanning